இலங்கை மற்றும் இந்தோனேசியக் குடியரசு ஆகியவற்றின் வெளிநாட்டு அலுவல்கள் அமைச்சுக்களுக்கு இடையிலான முதலாவது அரசியல் கலந்தாய்வுச் சுற்று, 2026 செப்டம்பர் 22 அன்று கொழும்பில் நடைபெற்றது. இது இரு நாடுகளுக்கும் இடையிலான நீண்டகால மற்றும் நட்புறவு ரீதியான உறவுகளில் ஒரு முக்கிய மைல்கல்லாக அமைந்தது.

இரு அமைச்சுக்களுக்கும் இடையே முறையான இருதரப்பு உரையாடல் மற்றும் மேம்படுத்தப்பட்ட ஒத்துழைப்புக்கான கட்டமைப்பை உருவாக்கும் வகையிலான புரிந்துணர்வு ஒப்பந்தம் ஒன்றில் கைச்சாத்திடுவதன் மூலம் இக்கலந்தாய்வுகள் ஆரம்பிக்கப்பட்டன. பரஸ்பர நலன் சார்ந்த முக்கிய துறைகளில் ஈடுபாட்டை அதிகரிக்கவும், நிறுவன ரீதியான பிணைப்புகளை வலுப்படுத்தவும் இரு தரப்பினரும் கொண்டுள்ள அர்ப்பணிப்பை இந்த ஒப்பந்தம் மீண்டும் உறுதிப்படுத்துகிறது.

இலங்கைத் தூதுக்குழுவிற்கு, வெளிநாட்டு அலுவல்கள், வெளிநாட்டு வேலைவாய்ப்பு மற்றும் சுற்றுலாத்துறை அமைச்சின் செயலாளர் அருனி ரனராஜ தலைமை தாங்கினார்; இந்தோனேசியத் தூதுக்குழுவிற்கு இந்தோனேசியக் குடியரசின் வெளிநாட்டு அலுவல்கள் அமைச்சின் ஆசிய-பசிபிக் மற்றும் ஆப்பிரிக்க அலுவல்களுக்கான பிரதி அமைச்சர் கலாநிதி செண்டோ டார்மோசுமாடோ தலைமை தாங்கினார்.

வெளிநாட்டுச் செயலாளர் ரணராஜ, தனது தொடக்க உரையில், இரு நாடுகளுக்கும் இடையிலான நீடித்த கூட்டாண்மையை எடுத்துரைத்தார். குறிப்பாக அணிசேரா இயக்கம் போன்ற முக்கிய இராஜதந்திர முன்னெடுப்புகளை முன்னெடுத்துச் செல்வதில் இரு நாடுகளும் வழங்கிய அடித்தளப் பங்களிப்பையும், அவர் நினைவு கூர்ந்தார். ஆசிய-பசிபிக் மற்றும் ஆப்பிரிக்க அலுவல்களுக்கான பிரதி அமைச்சர் கலாநிதி தர்மோசுமாடோ, தனது பதிலுரையில், இரு நாடுகளுக்கும் இடையே வழக்கமான ஈடுபாட்டிற்கும் ஒத்துழைப்பை ஆழப்படுத்துவதற்கும், ஒரு கட்டமைக்கப்பட்ட கட்டமைப்பாக இந்த புரிந்துணர்வு ஒப்பந்தம் கைச்சாத்தானதை வரவேற்றார். மேலும், பரஸ்பரரீதியில் பயனளிக்கும் துறைகளில் ஒத்துழைப்பை விரிவுபடுத்துவதற்கான வாய்ப்புகளையும் அவர் எடுத்துரைத்தார்.

ஆலோசனைகளின் போது, குறிப்பாக மருந்து, கனிம மற்றும் ஆடையுற்பத்தித் துறைகளில் வர்த்தகம் மற்றும் முதலீட்டை விரிவுபடுத்துவது உள்ளிட்ட பொருளாதார உறவுகளை மேம்படுத்துவதற்கும், இரு நாடுகளின் வணிக சமூகங்களுக்கு இடையே வலுவான இணைப்பை ஊக்குவிப்பதற்கும் இரு தரப்பினரும் இணங்கினர். வழக்கமான உயர் மட்ட கலந்துரையாடல்களை ஊக்குவித்தல்; சட்டமன்றங்களுக்கு இடையிலான ஒத்துழைப்பை விரிவுபடுத்துதல்; பாதுகாப்பு மற்றும் கடல்சார் பாதுகாப்பு ஒத்துழைப்பு; அதிகரித்து வரும் நாடுகடந்த அச்சுறுத்தல்களை எதிர்கொள்ள உளவுத் தகவல்களைப் பகிர்ந்துகொள்ளுதல்; உர விநியோகம் உள்ளிட்ட விவசாயத்துறைசார் ஒத்துழைப்பு, அத்துடன் மீன்வள ஒத்துழைப்பு ஆகியவை கலந்தாலோசனைகளின் முக்கிய அம்சங்களாக இருந்தன.

சுற்றுலாத்துறை ஒத்துழைப்பை ஆழப்படுத்துவதற்கும், வீசா நடைமுறைகளை எளிதாக்குவதற்கும், தடையற்ற பயணத்தை ஊக்குவிப்பதற்கும், இணைப்பை மேம்படுத்துவதற்கும் உள்ள குறிப்பிடத்தக்க சாத்தியக்கூறுகளை இரு தரப்பினரும் அங்கீகரித்ததோடு, வலுவான மக்கள் பரிமாற்றங்களுக்காக கல்வி மற்றும் கலாச்சார ஒத்துழைப்பை வலுப்படுத்த வேண்டும் என்றும் அடையாளம் கண்டனர்.

ஆசியானின் 'துறைசார் உரையாடல் பங்காளி' (SDP) அந்தஸ்தைப் பெறுவதற்கும், 'பிராந்திய விரிவான பொருளாதாரக் கூட்டாண்மை' (RCEP) ஒப்பந்தத்தில் இணைவதற்கும் இந்தோனேசியாவின் ஆதரவைக் கோரும் தனது விருப்பத்தை இலங்கை தரப்பு மீண்டும் வலியுறுத்தியது; இக்கோரிக்கை முறையாக ஏற்றுக்கொள்ளப்பட்டது.

2027-ஆம் ஆண்டில் இலங்கைக்கும் இந்தோனேசியாவிற்கும் இடையிலான இராஜதந்திர உறவுகளின் 75-வது ஆண்டு நிறைவைக் கொண்டாடும் வகையில் ஆண்டு முழுவதும் பல்வேறு நிகழ்வுகளை ஏற்பாடு செய்ய இரு தரப்புப் பிரதிநிதிகளும் ஒப்புக்கொண்டனர். இந்த வரலாற்றுச் சிறப்புமிக்க மைல்கல்லானது, இரு நாடுகளும் இணைந்து அடைந்த சாதனைகளைக் கொண்டாடுவதற்கும், இருதரப்பு உறவுகளை மேலும் வலுப்படுத்துவதற்கான புதிய வழிகளை ஆராய்வதற்கும் ஒரு முக்கிய தருணமாக அமையும் என்று அவர்கள் ஏற்றுக்கொண்டனர்.

தொடர்ச்சியான உரையாடல்களைப் பேணுவதிலும், இருதரப்பு ஒத்துழைப்பை மேம்படுத்துவதிலும் உள்ள பகிரப்பட்ட ஈடுபாட்டை மீண்டும் உறுதிப்படுத்தும் வகையில், 2028-ஆம் ஆண்டில் ஜகார்த்தாவில் இரண்டாவது சுற்று ஆலோசனைக் கூட்டத்தை நடத்துவது என்ற முடிவோடு இந்த ஆலோசனைகள் நிறைவடைந்தன.

இலங்கைத் தூதுக்குழுவில் இந்தோனேசியா மற்றும் ஆசியான் பிராந்தியத்திற்கான இலங்கைத் தூதுவர் சசிகலா பிரேமவர்தன, மேலதிக செயலாளர் (அரசியல் விவகாரங்கள்) எம்.ஆர்.கே. லெனகல, தென்கிழக்கு ஆசியா மற்றும் மத்திய ஆசியாவிற்கான பணிப்பாளர் நாயகம் சமரி ரொட்ரிகோ மற்றும் தொடர்புடைய நிறுவனங்களின் சிரேஷ்ட அதிகாரிகள் ஆகியோர் இடம்பெற்றிருந்தனர்.

வெளிநாட்டு அலுவல்கள், வெளிநாட்டு வேலைவாய்ப்பு 

மற்றும் சுற்றுலாத்துறை அமைச்சு

கொழும்பு
 

2026 செப்டம்பர் 23